Kryetari i Aleancës për Shqiptarët në Maqedoninë e Veriut, Arben Taravari, ka reaguar ashpër ndaj thirrjeve raciste të bëra nga tifozë maqedonas gjatë një ndeshjeje basketbolli mes Maqedonisë së Veriut dhe Rumanisë, të zhvilluar së fundmi në Kumanovë. Gjatë një vizite në qytetin e Pogradecit, pas një takimi me kryebashkiakun, Taravari e cilësoi incidentin si një ngjarje skandaloze, që ka tronditur opinionin publik dhe që është komentuar gjerësisht nga spektri politik në Maqedoninë e Veriut, përfshirë edhe disa parti maqedonase.
“Dua të falënderoj publikisht Shqipërinë dhe Kosovën për solidaritetin që treguan në këtë rast. Fatkeqësisht, jemi dëshmitarë të një trendi të rrezikshëm muajt e fundit, ku nacionalizmi maqedonas është në rritje të ndjeshme,” deklaroi Taravari.
Ai theksoi se një klimë e tillë politike ka qenë një ndër arsyet kryesore pse Aleanca për Shqiptarët vendosi të largohej nga qeveria tre muaj më parë, duke kaluar në opozitë dhe duke u përgatitur aktualisht për zgjedhjet lokale.
Sipas tij, retorika fyese ndaj shqiptarëve është nxitur edhe nga vetë kryeministri maqedonas, i cili disa ditë para ngjarjes kishte bërë deklarata fyese në parlament. Taravari vuri në dukje se këto qëndrime përçmuese reflektohen drejtpërdrejt në sjelljen e qytetarëve dhe kontribuojnë në përshkallëzimin e tensioneve ndëretnike.
“Nuk është rastësi që në raportin e fundit të Bashkimit Europian përmendet edhe ndikimi i rritur i botës serbe në institucionet e Maqedonisë së Veriut. Ky është një problem serioz që po ndikon negativisht në zhvillimet politike dhe shoqërore të vendit,” u shpreh ai.
Në përfundim, Taravari theksoi se ndonëse shqiptarët në Maqedoninë e Veriut janë të ndarë në dy blloqe politike, kjo përbën një lloj diversiteti të shëndetshëm që i shërben demokracisë dhe një shoqërie më të balancuar
