Komisioni i Ligjeve rrëzon kërkesën e PD për shkarkimin e Presidentit Begaj

Mbledhja e Komisionit të Ligjeve

Komisioni për Çështjet Ligjore dhe Administratën Publike ka rrëzuar kërkesën e opozitës për shkarkimin e Presidentit Bajram Begaj.

Deputeti demokrat Gjin Gjoni tha se Grupi Parlamentar i PD ka paraqitur kërkesën për fillimin e procedurës për shkarkimin e Presidentit për shkelje të rëndë dhe të vazhdueshme.

Ai renditi shkeljet që opozita pretendon se janë kryer nga presidenti Begaj. Sipas PD, ai dekretoi zgjedhje në Tiranë në shkelje të Kushtetutës, ndërhyri në mandatin e anëtarëve të Gjykatës Kushtetuese, si edhe dekretoi në shkelje të ligjit për Komisionet Hetimore.

7 shkeljet që opozita pretendoi se janë kryer nga presidenti Bajram Begaj janë:

Ndërhyri në mandatin e anëtarëve të Gjykatës Kushtetuese dhe preku pavarësinë e tyre

Dekretoi në shkelje të ligjit për Komisionet Hetimore

Dekretoi ministren virtuale ‘Diella’

Nuk ndali trupën diplomatike nga përfshirja në fushatën e vitit 2025

Kabineti i tij ndërhyri në procesin e administrimit të zgjedhjeve

I biri i punësuar fiktivisht në një kompani private sigurimesh që përfiton tendera nga presidenca

Vetë Begaj i punësuar në një klinikë private

Por për socialistët, këto shkelje nuk ishin bindëse për të shkarkuar presidentin. Pasi kundërshtoi të gjitha pretendimet e opozitës, Manja tha se Begaj është president i nderuar.

“Presidenti i Republikës, Bajram Begaj, është mjek në profesion, siç janë edhe shumë të tjerë me profesione të ndryshme. Ka qenë ish-shef i Shtabit të Përgjithshëm të Forcave të Armatosura dhe sot është president i nderuar i Republikës së Shqipërisë. I ka dhënë Shqipërisë atë që shumë pak prej nesh kanë pasur mundësinë t’i japin,” tha Manja.

Kërkesa u hodh në votim dhe rezultoi me 5 vota pro të opozitës dhe 9 kundër të mazhorancës.