Kundërshtimeve ndaj Paketës Fiskale 2027 i janë bashkuar edhe bizneset gjermane që operojnë në Shqipëri. Shoqata Gjermane e Industrisë dhe Tregtisë (DIHA) ka paralajmëruar se rritja e taksave të propozuara nga qeveria mund të rëndojë aktivitetin e kompanive, të ndikojë në çmimet e konsumit dhe të kufizojë investimet e reja.
Në reagimin e saj, DIHA ngre shqetësimin se ndryshimet fiskale janë hartuar pa një konsultim të plotë me komunitetin e biznesit. Sipas shoqatës, projektligjet nuk janë publikuar për konsultim publik, ndërsa versionet përfundimtare i janë paraqitur Këshillit Tatimor vetëm pak kohë përpara dorëzimit në Parlament.
Përfaqësuesit e investitorëve gjermanë theksojnë se ndryshimet e parashikuara të hyjnë në fuqi më 1 janar 2027 u lënë kompanive shumë pak kohë për të përshtatur kontratat, buxhetet dhe planet e tyre të investimit.
Një nga kundërshtimet kryesore lidhet me rritjen e tatimit mbi dividendët. Sipas DIHA-s, kjo masë mund ta bëjë Shqipërinë më pak tërheqëse për investitorët, veçanërisht në krahasim me vendet e tjera të Ballkanit Perëndimor.
Shqetësime ngrihen edhe për rritjen e TVSH-së standarde nga 20% në 21%, e cila sipas shoqatës mund të reflektohet në çmimet e mallrave dhe shërbimeve. Bizneset gjermane paralajmërojnë se kjo rritje mund të zbehë përfitimin që qytetarët pritet të kenë nga ulja e TVSH-së për produktet ushqimore bazë.
Kritika ka gjithashtu për rritjen e TVSH-së në sektorin e turizmit dhe uljen e pragut të regjistrimit në TVSH. DIHA vlerëson se këto masa do të shtojnë kostot për bizneset e vogla dhe kompanitë turistike, duke ndikuar në konkurrueshmërinë e tyre.
Shoqata paralajmëron se barra më e lartë tatimore mund të kufizojë fondet që kompanitë përdorin për zgjerimin e aktivitetit, modernizimin dhe krijimin e vendeve të reja të punës.
Megjithatë, DIHA vlerëson pozitivisht vendimin për të mos rritur tatimin mbi fitimin e korporatave, si dhe lehtësimet e propozuara për familjet dhe punonjësit. Shoqata propozon gjithashtu uljen e TVSH-së për energjinë elektrike, me qëllim reduktimin e kostove për konsumatorët dhe sipërmarrjet.
Në përfundim, bizneset gjermane i kërkojnë qeverisë dhe Parlamentit të rishikojnë masat e kundërshtuara, të zhvillojnë konsultime përpara miratimit të paketës dhe të parashikojnë një periudhë tranzitore për zbatimin e ndryshimeve.
Reagimi i DIHA-s vjen pas kundërshtimeve të shprehura edhe nga organizata të tjera të biznesit vendas dhe të huaj, të cilat kanë ngritur shqetësime për ndikimin e taksave të reja në ekonomi, investime dhe punësim.
