Përgatitja për një intervistë pune nuk përfshin vetëm CV-në, aftësitë dhe përgjigjet e duhura. Sipas studimeve, edhe mënyra se si vishemi dhe paraqitemi mund të ndikojë ndjeshëm në vendimin e punëdhënësit.
Këtë e përjetoi edhe 23-vjeçarja Taya Reed nga Londra, e cila arriti të sigurojë vendin e saj të ëndrrave në kompaninë e modës Tala. Përveçse përgatiti një strategji marketingu për kompaninë, ajo mendoi me kujdes edhe veshjen që do të përdorte në intervistë.
“Doja të tregoja se përshtatesha me kulturën e kompanisë”, thotë Reed, e cila u paraqit me një veshje tërësisht të bardhë, fund të gjatë veror dhe këpucë balerine. Përpjekja dha rezultat dhe ajo u punësua.
Në një treg pune gjithnjë e më konkurrues, sidomos për të rinjtë, pamja mund të bëjë diferencën. Një studim britanik i vitit 2020 zbuloi se 51% e punëdhënësve pranuan se kishin refuzuar kandidatë për shkak të pamjes së tyre, duke përmendur veshjen e çrregullt apo flokët e papërshtatshëm si faktorë ndikues.
Sipas profesoreshës së burimeve njerëzore Min-Hsuan Tu nga Universiteti i Buffalos, intervistat nuk janë gjithmonë plotësisht të drejta. Njerëzit fizikisht tërheqës priren të punësohen më shpesh, pasi shpesh perceptohen si më të besueshëm, më inteligjentë dhe me aftësi më të mira komunikimi.
Megjithatë, ajo thekson se atraktiviteti nuk lidhet vetëm me tiparet fizike, por edhe me kujdesin për paraqitjen personale, veshjen dhe mënyrën se si një kandidat prezantohet.
Një tjetër kandidat, amerikani Matt Cohen, i cili gjeti punë në Londër pas gati një viti kërkimesh dhe mbi 100 aplikimesh, zgjodhi të vishej më formalisht se punonjësit e kompanisë ku aplikoi. Ai u kujdes për mjekrën, prerjen e flokëve dhe kontaktin me sy gjatë intervistës.
Përveç pamjes, ai përdori edhe një teknikë psikologjike për të ulur ankthin: imagjinonte se intervistuesit ishin tashmë miqtë e tij dhe se puna i ishte ofruar, ndërsa intervista shërbente vetëm për të diskutuar detajet.
Ekspertja britanike e karrierës Caroline Hickey thotë se kujdesi për pamjen dërgon një sinjal të pavetëdijshëm se kandidati e merr seriozisht mundësinë e punësimit. Sipas saj, një paraqitje profesionale e ndihmon intervistuesin ta imagjinojë më lehtë kandidatin si pjesë të ekipit ose përballë klientëve.
Edhe në intervistat online, detajet bëjnë diferencën. Studentja amerikane Madeline Drucker tregon se përgatiste flokët, grimin, vishte rroba të rregullta dhe kujdesej që sfondi i videos të ishte i pastër, sepse kur ndihej mirë me pamjen e saj, fitonte më shumë vetëbesim dhe performonte më mirë.
Mesazhi i studiuesve është i qartë: aftësitë dhe përgatitja mbeten vendimtare, por mënyra se si paraqiteni mund të ndikojë në përshtypjen e parë dhe t’ju japë një avantazh të rëndësishëm në garën për një vend pune.
