Ndërsa Kosova kufizon me ligj mbjelljen e flokëve, botoxin dhe fillerat vetëm për mjekë të specializuar, në Shqipëri estetistet vazhdojnë të ofrojnë këto procedura pa licencë dhe pa mbikëqyrje.
Kosova ka ndërmarrë masa të reja për të kontrolluar ndërhyrjet estetike, duke përcaktuar qartë se kush mund t’i kryejë këto procedura. Sipas njoftimit zyrtar të Ministrisë së Shëndetësisë, vetëm institucionet e licencuara dhe profesionistët me kualifikim mjekësor mund të ofrojnë trajtime si mbjellja e flokëve, botox, filler dhe procedura të tjera estetike. Këto shërbime mund të kryhen vetëm nga specialistë të fushave të mëposhtme:
Kirurgji plastike
Dermatologji
Kirurgji maksilofaciale
ORL (vesh, hundë, fyt)
Ndryshe nga Kosova, në Shqipëri tregu i estetikës është kthyer në “fushë të hapur”.
Qendrat estetike janë shtuar ndjeshëm, shpesh pa licencë dhe pa mbikëqyrje nga autoritetet shëndetësore. Shumë vajza që kanë ndjekur vetëm kurse të shkurtra kozmetike guxojnë të kryejnë injeksione botoxi apo fillera, duke vënë në rrezik serioz shëndetin dhe pamjen e vajzave që u besojnë.Mjekët dermatologë paralajmërojnë se ndërhyrje të tilla të kryera nga persona të paautorizuar mund të shkaktojnë infeksione, dëmtime të indeve dhe deformime të fytyrës.
Me këto masa të reja, Kosova po tregon një qasje të përgjegjshme dhe profesionale për të mbrojtur qytetarët nga rreziqet e ndërhyrjeve estetike të pakontrolluara. Në anën tjetër, Shqipëria mbetet pas në kontrollin dhe licencimin e kësaj industrie që po rritet me ritme të shpejta.
