SPAK reagon zyrtarisht lidhur me pretendimet e Sali Berishës sr nuk ka marrë fletëthirrje për të dëshmuar për ngjarjet e 21 janarit. Sipas prokurorisë Berisha ka refuzuar dy fletëthirrje.
Në sqarimin e shpërndarë për mediat, Prokuroria e Posaçme bën me dije se:
Më 3 nëntor 2025 është dërguar urdhër-thirrja e parë në adresën e banesës së Berishës, për paraqitje në SPAK më 7 nëntor 2025.
Zarf i është kthyer mbrapsht institucionit me shënimin: “Rojet janë autorizuar të mos marrin asnjë zarf.”
Pas këtij refuzimi, më 7 nëntor 2025, SPAK dërgoi një tjetër urdhër-thirrje në tre destinacione: banesë, Partinë Demokratike dhe Kuvendin e Shqipërisë, për paraqitje në datën 14 nëntor 2025.
Më 9 nëntor, marrja e zarfit të dërguar në banesë është refuzuar sërish.
Më 12 nëntor, Shërbimi i Burimeve Njerëzore dhe Trajtimit të Deputetëve në Kuvend njoftoi se njoftimi është refuzuar nga stafi politik i grupit parlamentar të Partisë Demokratike.
SPAK thekson gjithashtu se njoftimi i urdhër-thirrjes është dërguar edhe në adresën zyrtare të emailit të Berishës, [email protected], më 10 nëntor 2025.Prokuroria e Posaçme do të vijojë zbatimin e të gjitha parashikimeve ligjore për njoftimin dhe paraqitjen e personit të thirrur, sipas afateve dhe detyrimeve të përcaktuara në ligj”, shprehet SPAK.
Ndërkohë, Berisha deklaroi edhe sot se nuk ka marrë asnjë njoftim zyrtar nga SPAK. Por të dhënat e publikuara nga dy institucione, SPAK dhe Kuvendi, tregojnë se fletëthirrjet janë dërguar sipas procedurës dhe janë refuzuar.
