Kryetari i PD, Sali Berisha, në deklaratën e sotme për mediat i ka qëndruar verisonit të tij se pse nuk është paraqitur sot në SPAK për të dëshmuar për 21 Janarin.
Berisha tha se SPAK nuk ia ka dërguar fletëthirrjen zyrtarisht.
“Ai dokument mund të vinte 5 herë në zyrën time, në shtëpinë time me postë. Nuk ka ardhur asnjëherë”, tha Berisha.
Kryedemokrati gjithashtu e quajti mashtrim edhe reagimin e Kuvendit, i cili u shpreh se fletëthirrja ka mbërritur dhe në zyrat e këtij institucioni, por nuk ishte tërhequr nga Berisha.
"Po kanë bërë këtë, janë mashtrues ordiner. Nëse këta thonë që ja dërguam dhe nuk e pranoi janë mashtrues dhe të pafytyrë. Unë kam tek pallati njerëz që marrin postën, le të nxjerrin firmën. Unë kam njerëz në seli. Atëherë pse del që paskan marrë vetëm Parlamentin e Taulantit", tha Berisha.
Por ndryshe nga çfarë pretendon kreu i PD, fletëthirrja i ka mbërritur në tre adresa të tij, në shtëpi, në selinë e PD dhe në Kuvend. Madje ditën e sotme edhe Kuvendi u shpreh se fletëthirrjen e SPAK, grupi parlamentar i PD nuk e ka tërhequr.
