Klasa politike po përgatitet të ndryshojë rregullat e lojës për zgjedhjet, ndërsa ndërkombëtarët kërkojnë që procesi të jetë gjithëpërfshirës dhe me rezultate konkrete. Ambasadori i BE në Tiranë, Silvio Gonzato, i bëri thirrje komisionit bipartizan që nis punën të martën dhe të udhëhiqet nga rekomandimet e OSBE/ODIHR dhe Komisionit të Venecias.
“Nevoja për një reformë dhe sistem zgjedhor gjithëpërfshirës, të cilin e kemi kërkuar prej kohësh, është e nënvizuar në raportin e fundit të OSBE/ODIHR, që nxjerr mangësitë domethënëse në procesin zgjedhor, keqpërdorimin e burimeve shtetërore, mungesën e fushës së barabartë të lojës, rëndësinë e pavarësisë së institucioneve dhe mbikëqyrjen e fushatave për kushte të barabarta mes aktorëve politikë. Këto reforma janë hapa themelorë në rrugëtimin e Shqipërisë drejt BE-së,” u shpreh Gonzato.
Ndërkohë, Komisioneri Shtetëror i Zgjedhjeve, Ilirjan Celibashi, theksoi se ka ardhur koha që politika të mos ndërhyjë më në administrimin e procesit zgjedhor. Ai kërkoi depolitizimin e administratës dhe propozoi një formulë mikse për organizimin e saj.
“Dominimi vetëm nga partitë politike të administrimit të zgjedhjeve në Shqipëria krijuar handikapin e vet ne lidhje me standardin profesional te administrimit te zgjedhjeve. Ndaj konfirmoj qëndrimin e KQZ për të ndryshuar definitivisht mënyrën si administrata zgjedhore është e organizuar. Kjo nuk do thotë që partitë politike të zhvishen tërësisht nga tërësia e tyre, por dhe nga mundësia për të qenë pjesë e administrimit, por jo sikurse është sot kur 100% e procesit administrohet prej tyre.“, u shpreh Celibashi.
Mbledhjet e para të komisioneve të përbashkët ishin parashikuar të zhvilloheshin dje, por u shtynë në minutën e fundit. Kjo vonesë ka shqetësuar edhe kryeministrin Edi Rama, i cili nervozizmin ia ka shfryrë me zë të lartë njërit nga bashkëkryetarët socialistë përmes telefonit nga rrugët e Romës.
