Kryeministri Edi Rama është kapur sot në rrugët e Romës duke folur me zë të lartë në telefon, duke kërkuar llogari nga “bashkëkryetari i një komisioni”, që sipas të gjitha gjasave i referohet njërës prej dy tryezave të mëdha parlamentare: komisionit të Reformës Zgjedhore ose atij të Reformës Territoriale.
Burime pranë shumicës thonë se nervozizmi i Ramës lidhet me faktin që deputetët e PS-së, Damian Gjiknuri apo Arbjan Mazniku, ende nuk kanë nisur zyrtarisht punën në komisionet ku janë bashkëkryetarë me Oerd Bylykbashin dhe Luciano Boçin nga opozita.
Mbledhjet e para të komisioneve të përbashkëta ishin parashikuar të zhvilloheshin dje, por u shtynë në minutën e fundit—një zhvillim që duket se ka ngjallur shqetësim në selinë rozë. Jo për produktin e këtyre tryezave, i cili historikisht ka qenë i varfër dhe i pakonsultuar, por për mesazhin që ky bllokim i dërgon Brukselit, ku kërkohet bashkëpunim formal mes mazhorancës dhe opozitës për reformat kyçe.
Ironikisht, herën e fundit që PS dhe PD u ulën në një tryezë të përbashkët, rezultati ishte ndryshimi i njëanshëm i mbylljes së listave të deputetëve për llogari të Ramës dhe Berishës vetëm pak muaj para zgjedhjeve parlamentare të 11 majit—një proces që u kritikua nga opinioni dhe konsiderohet një nga devijimet më të rënda nga standardet demokratike.
Megjithatë, duket se këtë herë shqetësimi i Ramës është më shumë politik sesa teknik: në sytë e BE-së, çdo vonesë e komisioneve përkthehet si mungesë vullneti për reformë, në një moment kur qeveria ka nevojë të tregojë se vendi po ecën me ritëm drejt integrimit.
