Nuk mjaftuan reagimet tallëse me zhargon banal të Bylykbashit dhe Nokës; sot PD nxori edhe Floriana Garon për t’i dhënë “goditjen” e radhës deklaratës së Komisioneres për Zgjerimin në BE, Marta Kos.
Floriana Garo zgjodhi rrugën zyrtare për të folur në emër të partisë, përmes një deklarate për mediat. Në fjalimin e saj, zëdhënësja e PD-së u shpreh se Kos, me deklaratën e saj, ka shkelur ligjet kombëtare dhe ndërkombëtare që lidhen me vlerësimin e zgjedhjeve.
Madje, Garo shkon edhe më tej, duke thënë se me këtë deklaratë për zgjedhjet, Marta Kos i është bashkuar Edi Ramës dhe Taulant Ballës, të cilët sipas saj janë të vetmit që kanë bërë një deklaratë të ngjashme.
Në fund, zëdhënësja e selisë blu deklaron se qëndrimet e Kos janë “të frymëzuara ideologjikisht nga ekstremi i majtë dhe nga propaganda e paguar e mikut të saj, Edi Rama”.
Me gjithë këto akuza dhe kritika të Floriana Garos ndaj komisioneres së BE-së, duket se PD ka mbyllur ciklin e sulmeve ndaj Kos. Tani mbetet të luftojë superpushtetin e Ramës për vitet që i kanë mbetur në opozitë, me figura qesharake dhe deklarata që nuk shërbejnë për asgjë.
