Partia Demokratike ka ndërmarrë një sulm të organizuar politik ndaj Komisioneres së Zgjerimit të BE-së, Marta Kos, pas deklaratës së saj se zgjedhjet e 11 majit në Shqipëri ishin “të lira”.
I pari që doli publikisht ishte kreu i Grupit Parlamentar të PD, Gazment Bardhi, i cili e akuzoi Kos për qëndrime të njëanshme duke e quajtur edhe “zëdhënëse të një qeverie të korruptuar”.
“Zonja Kos mos u bëj Bozë!” –u shpreh sekretari i përgjithshëm i PD-së, Flamur Noka, pas deklaratave të komisioneres për Zgjerimin, Marta Kos, në Tiranë. Ndërsa nënkryetari i PD-së, Oerd Bylykbashi, shtoi: “Raporti i ODIHR-it nuk mund të hollohet me ujë siç bëri sot zonja Kos.”
Këto janë vetëm dy nga batutat pa kripë me të cilat dy nga drejtuesit më të lartë të PD-së iu drejtuan sot komisioneres, pas qëndrimeve të saj mbi proceset politike dhe zgjedhore në Shqipëri. Është e kuptueshme që si drejtues të opozitës ata mund të mos jenë dakord me deklaratat e saj, por tallja me mbiemrin e komisioneres shkon përtej debatit politik.
Për më tepër, Marta Kos, e lindur në Slloveni, nuk ka asnjë lidhje kulturore që ta bëjë krahasimin me kosin shqiptar domethënës për të. Në fakt, kjo lloj gjuhe tregon më shumë për nivelin e politikanëve tanë se për komisioneren.
Thënë ndryshe, kaq poshtë ka rënë fantazia e politikanëve shqiptarë: për të bërë politikë me përfaqësuesen e Bashkimit Europian, përdorin bulmetin. Tani mbetet vetëm të imagjinojmë se çfarë do t’u duhet të përdorin kur të merren me politikanët lokalë në seancën e ardhshme të Parlamentit…
