Shumica parlamentare ka rrëzuar kërkesën e opozitës për shkarkimin e kryetarit të Kuvendit, Niko Peleshi. Deputetët e Partisë Socialiste kanë përgatitur një raport ku renditen arsyet pse kërkesa e opozitës nuk është pranuar, i cili tashmë i është dërguar për miratim seancës plenare.
Në raport theksohet se nuk është provuar asnjë nga shkeljet e pretenduara nga Partia Demokratike. Sipas mazhorancës, Peleshi ka ushtruar me korrektësi të gjitha përgjegjësitë e tij kushtetuese dhe ligjore në drejtimin e seancave plenare.
“Kryetari i Kuvendit ka zbatuar me përpikëri të gjitha përgjegjësitë e tij kushtetuese dhe ligjore në drejtimin e seancës plenare. Kryetari i Kuvendit ka treguar frymën e bashkëpunimit dhe tolerancës në drejtimin e veprimtarisë parlamentare në tërësi, duke respektuar më së pari kolegët deputetë të opozitës dhe duke qëndruar mbi palët gjatë drejtimit të seancës”, thuhet në raport.
Socialistët shtojnë se kërkesa e opozitës nuk përmbush kushtin thelbësor që shkelja të jetë për shkaqe kushtetuese, siç parashikon neni 114/1 i Rregullores së Kuvendit.
