Gjykata Kushtetuese ka rrëzuar kërkesën e Naureda Llagamit për anulimin e procedurës së votimit të zhvilluar më 30 shtator në Gjykatën e Lartë për emërimin e Asim Vokshit si anëtar i Kushtetueses, si dhe për shfuqizimin e vendimit të Gjykatës Administrative të datës 13 tetor që kishte refuzuar shqyrtimin e çështjes.
Seanca për shqyrtimin e kërkesës u mbajt një ditë më parë, ndërsa vendimi u shpall sot nga Gjykata Kushtetuese.
Gjatë votimit në Gjykatën e Lartë, Llagami siguroi 9 vota — pikërisht shumicën e cilësuar prej 3/5 që kërkohet për t’u zgjedhur — por një prej tyre u shpall e pavlefshme pasi kishte dy shenja në fletën e votimit. Si pasojë, në përputhje me renditjen e Këshillit të Emërimeve në Drejtësi (KED), anëtar i Gjykatës Kushtetuese u shpall kandidati i renditur i pari, Asim Vokshi.
Llagami kërkoi gjithashtu pezullimin e emërimit të Vokshit derisa të shqyrtohej kërkesa e saj, por edhe kjo u rrëzua.
Më herët, ajo ishte drejtuar Gjykatës Administrative, e cila e kishte shpallur kërkesën jashtë juridiksionit të saj. Pas polemikave publike që pasuan, Gjykata e Lartë reagoi duke deklaruar se procesi ishte zhvilluar në përputhje me rregulloren e saj të brendshme, duke cituar nenin 12, pika 6, që “ndalon çdo shënim tjetër në fletën e votimit përveç shenjës së përcaktuar”, si dhe nenin 13, pika “b”, sipas të cilit “vota është e pavlefshme kur në fletë janë bërë shënime në favor ose në disfavor të kandidatëve”.
