Kreu i Grupit Parlamentar të Partisë Demokratike, Gazment Bardhi, ka mohuar që deputetët e grupit apo stafi i tyre të kenë marrë ndonjë fletëthirrje nga SPAK për Sali Berishën për çështjen e 21 janarit. Sipas Bardhit, administrata e Kuvendit nuk ka depozituar asnjë njoftim në kutitë postare të deputetëve të PD-së.
“Prokuroria nuk ka dërguar asnjë njoftim drejtuar Grupit Parlamentar dhe për pasojë stafi ynë nuk ka pasur çfarë të refuzojë. Referimi i SPAK për një gënjeshtër të thënë nga Kuvendi meriton vetëm përbuzje”, tha Bardhi në reagimin e tij zyrtar. Rezulton e provuar se në kutitë postare të asnjë deputeti të grupit tonë parlamentar, që ndodhen brenda ambienteve të Kuvendit, nuk ka të depozituar asnjë njoftim të dërguar nga SPAK nga ana e administratës së Kuvendit të Shqipërisë”, shprehet Bardhi.
Ai theksoi se ofrimi i shërbimeve postare nuk hyn në fushën e përgjegjësive të stafit parlamentar dhe akuzoi mazhorancën socialiste për keqpërdorim politik dhe propagandë të inskenuar përmes Prokurorisë së Posaçme.
"Sa më lart, shprehim keqardhje për keqpërdorimin politik të Prokurorisë së Posacme, për propagandë dite të inskenuar nga mazhoranca socialiste në Kuvendin e Shqipërisë", shprehet më tej Bardhi.
Ndërkohë, kryetari i Partisë Demokratike, Sali Berisha, nuk është paraqitur sot në SPAK duke pretenduar se nuk i ka shkuar asnjë fletëthirrje në adresë të tij. Por SPAK në një reagim për mediat tha se kishte dërguar njoftimin në tre destinacione në banesë, Partinë Demokratike dhe Kuvendin e Shqipërisë, por në të treja rastet është refuzuar.
Ky zhvillim shton tensionin mes PD-së dhe SPAK, ndërsa çështja e 21 janarit mbetet një nga proceset më të ndjekura dhe të debatueshme politike në vend.
