Ne dukje eshte nje tender banal, nga ata qe në Shqipëri vidhen rregullisht çdo ditë. Vetëm 800 mijë euro “të qelbta” – do t’i etiketonin grabitqarët e fondeve publike, ndërsa bëhet fjalë për 800 mijë euro që QSUT i ka projektuar për të blerë vegla për kirurgjinë e zemrës për dy vitet e ardhshme. I ka fituar kompania Evita e Klodian Allajbeut edhe pse ka paraqitur ofertë më të lartë se kompania tjetër Montal.
Por as ky nuk është ndonjë fakt kaq i çuditshëm në një vend ku tenderat janë objekt abuzimesh dhe “gogoli” SPAK është i vetmi që i ka bërë zyrtarët ta mbajnë pak dorën kur firmosin. Çudia më e madhe në këtë tender prej 800 mijë eurosh është që Klodian Allajbeu, pronari i dy spitaleve private, i shet spitalit shtetëror të Tiranës vegla për të kryer operacione.
Thënë ndryshe, spitali shtetëror dhe ai privat që duhet të jenë në konkurrencë me njëri-tjetrin as nuk e marrin në konsideratë këtë fakt, sepse pronari privat ka vendosur t’i shesë shtrenjtë ca vegla operacioni spitalit shtetëror – në rolin e distributorit këtë herë – dhe të përfitojë 800 mijë eurot e radhës.
A thua se QSUT apo operatorë të tjerë janë të paaftë dhe duhet që Klodian Allajbeu të përfitojë edhe nga qindarkat, siç mund të konsiderohen 800 mijë eurot e këtij tenderi, krahasuar me afro 220 milionë eurot që ai ka përfituar nga koncesionet e dializës dhe ai i laboratorëve.
Është për të ardhur keq që në këto kushte të gjithë heshtin: media hesht për arsye marketingu, politika për arsye sponsorizimi dhe bamirësit e FB për arsye që i dinë vetë. Sikur është shumë më e thjeshtë të bërtasësh e të ngresh zërin për milionat e tunelit dhe të rrugëve. Edhe ato nga xhepat tanë kanë dalë.
Por edhe pse janë “vetëm” 800 mijë euro të qelbta, do të jenë shumë më tepër kur disa shqiptarë të kenë nevojë të marrin shërbim tek kardiokirurgjia. E të gjithë të lartpërmendurit do shkojnë te “spitali i Klodit” pa paguar. Ju të tjerët do përplaseni te 800 mijë eurot e qelbta që ua vodhën sot sy për sy.
