SPAK i komunikon akuzën Belinda Ballukut për shkelje të barazisë në tendera

Prokuroria e Posaçme kundër Korrupsionit dhe Krimit të Organizuar i ka komunikuar sot zyrtarisht akuzën ministres së Infrastrukturës dhe Energjisë, Belinda Balluku, për veprën penale “Shkelje e barazisë së pjesëmarrësve në tendera apo ankande publike”, në bashkëpunim, sipas neneve 258/2 dhe 25 të Kodit Penal.

Hetimi po kryhet në kuadër të procedimit penal nr.136 të vitit 2025, të bashkuar me procedimet nr.167 dhe 181 të vitit 2024. Sipas SPAK-ut, akuzat lidhen me veprimet e Ballukut në cilësinë e ministres, në një nga procedurat e prokurimit publik për projektin “Ndërtimi i tunelit të Llogarasë”, në seksionin Orikum-Himarë të autostradës SH8. Procedura është zhvilluar në 11 dhjetor 2020 dhe, pas anulimit, është rihapur më 22 qershor 2021, me një fond limit prej 18.9 miliardë lekësh pa TVSH.

SPAK njofton se Balluku është informuar për akuzën më 21 tetor 2025, por ajo njoftoi se nuk mund të paraqitej në datën e caktuar. Pas kërkesës së dytë të Prokurorisë, me shkresë të datës 24 tetor, ministrja është paraqitur sot, më 31 tetor 2025, në orën 15:00, ku iu komunikua zyrtarisht statusi i të pandehurës dhe akuzat ndaj saj.

Hetimet ndaj Ballukut vijojnë në fazë paraprake.