Detaje të reja nga shpërthimi i tritolit në shtëpinë e Bakie Zotos nënës së Gentian Zotës alias Dautaj në Vlorë. Burime nga policia e Vlorës bëjnë me dije se kamerat e sigurisë kanë fiksuar një makinë që afrohet dhe qëndron pak para pallatit. Pasi automjeti largohet ndodh dhe shpërthimi që për fat të mirë nuk pati të lënduar, por vetën dëme materiale.
Policia është vënë në ndjekje të automjetit, për të cilin nuk ka njoftim të jetë djegur, sic ndodh pas ngjarjeve kriminale.
Ngjarja dyshohet se ka lidhje me Gentian Zoton, i cili po vuan një dënim me 35 vite burg për atentatin ndaj Inez Hajrulla në vitin 2019. Sipas policisë shpërthimi i lëndës plasëse ka qenë më shumë një kërcënim sesa tentativë për të vrarë ndonjë person, pasi sasia ka qenë e vogël. Bakie Zoto 63 vjeç jetonte e vetme në banesë.
