Katër ngjarje të rënda brenda pak orësh trondisin vendin: Tritol në Shkodër, tre vrasje në Durrës, Tiranë e Berat

Një ditë e zezë për vendin, me katër ngjarje të rënda të regjistruara brenda disa orësh në qytete të ndryshme të Shqipërisë.

Në Shkodër, një shpërthim me tritol tronditi lagjen “Ndoc Mazi”, ku objektiv ishte 38-vjeçari Enea Busukja, punonjës i Tatimeve. Lënda plasëse ishte vendosur në makinën e tij dhe shpërtheu sapo ai ndezi mjetin. Busukja mbeti i plagosur dhe ndodhet në spital, ndërsa policia gjeti një makinë të djegur në fshatin Dragoç, që dyshohet të jetë përdorur nga autorët e atentatit.

Pak orë më vonë, në Durrës, një ngjarje e rëndë familjare tronditi zonën e Shkallnurit. 25-vjeçari Marjan Kodheli vrau me thikë babanë e tij, Pjetër Kodheli, brenda banesës. Dyshohet se i riu vuante nga probleme të shëndetit mendor.

Në Tiranë, një konflikt pune në një lokal-piceri në zonën e Komunës së Parisit përfundoi në tragjedi. Kamerieri 34-vjeçar Indrit Ismaillari mbeti i vrarë pas një sherri me kuzhinierin Filip Shehu, i cili e goditi me thikë. Shehu është arrestuar menjëherë pas ngjarjes dhe ka deklaruar se sherri ndodhi për motive pune.

Ndërkohë, në Berat, një konflikt për motive të dobëta u kthye në vrasje. 63-vjeçari Kristo Mema, i njohur edhe me emrin Kastriot Hoxha, goditi me thikë 42-vjeçarin Keli Hoxha, banues në Tiranë, i cili humbi jetën në vend. Ngjarja ndodhi në Kalanë e Beratit, ndërsa shkak dyshohet të jetë bërë një kalë që mbante autori. Mema, që rezulton me precedent penal në Greqi, është shpallur në kërkim nga policia.

Katër ngjarjet e ndodhura brenda pak orësh, atentat, vrasje familjare, konflikt pune dhe përplasje për motive të dobëta, kanë ngritur shqetësime për rritjen e dhunës dhe pasigurisë në vend.