Një ngjarje tragjike ka tronditur qytetin e Bulqizës ditën e djeshme, ku një 66-vjeçar ka humbur jetën si pasojë e rënies së një masivi shkëmbor në një prej galerive të një subjekti minerar.
Viktima, shtetasi F.V., ishte duke punuar në momentin kur ndodhi aksidenti fatal. Ngjarja ka shkaktuar reagime të forta në opinionin publik, duke rikthyer edhe një herë vëmendjen te kushtet e vështira dhe shpeshherë të pasigurta të punës në minierat shqiptare.
Si rezultat i hetimeve paraprake, Policia e Bulqizës ka vënë në pranga pesë punonjës të stafit teknik të minierës, të cilët dyshohen për mosrespektim të rregullave të sigurisë në vendin e punës.
Të arrestuarit janë:
Njazi Përkola, 46 vjeç
Besnik Çupi, 68 vjeç
Ferit Truka, 61 vjeç
Ervis Kadiu, 35 vjeç
Edmond Xhafa, 51 vjeç
Sipas Policisë, veprimet ose mosveprimet e këtyre shtetasve kanë çuar në mungesën e masave të duhura për sigurimin teknik të punës, çka dyshohet se ka sjellë pasojën tragjike.
Ngjarja po hetohet nga Prokuroria e Dibrës, ndërsa ndaj të arrestuarve rëndon akuza për veprën penale “Shkelja e rregullave të mbrojtjes në punë”, me pasojë vdekjen.
Njoftimi i Policisë:
Nuk morën masa për sigurimin e kushteve të mbrojtjes në subjektin minerar ku humbi jetën dje, shtetasi F.V., arrestohen 5 punonjës të stafit teknik.
Në vijim të veprimeve hetimore dhe operacionale të kryera me qëllim zbardhjen e përgjegjësive dhe rrethanave, në lidhje me ngjarjen e djeshme, të ndodhur në një subjekt minerar në Bulqizë, ku humbi jetën shtetasi F. V., 66 vjeç, dyshohet se si pasojë e rënies së një masivi shkëmbor, gjatë punës në galeri, shërbimet e Komisariatit të Policisë Bulqizë arrestuan në flagrancë shtetasit Nj. P., 46 vjeç, B. Ç., 68 vjeç, F. T., 61 vjeç, E. K., 35 vjeç dhe E. Xh., 51 vjeç, të gjithë punonjës të stafit teknik të subjektit minerar.
Nga hetimet e deritanishme rezulton se këta shtetas, me veprimet ose mosveprimet e tyre, nuk kanë marrë masat e duhura për garantimin e kushteve të sigurimit teknik të punës në subjektin minerar.
Materialet procedurale iu referuan Prokurorisë së Dibrës, për veprime të mëtejshme, për veprën penale “Shkelja e rregullave të mbrojtjes në punë”, me pasojë vdekjen.
