Gjykata e Apelit këtë të hënë vendosi të lërë në fuqi masën e paraburgimit për Gjon Shkambin, xhaxhain e të dyshuarit për vrasjen e gjyqtarit Astrit Kalaja. Shkambi kishte kërkuar lirimin, por gjykata konfirmoi vendimin e shkallës së parë.
Ai mohoi se kishte dijeni që nipi i tij, Elvis Shkambi, mbante armë, duke theksuar se gjithmonë ka zgjedhur rrugën ligjore për të zgjidhur konfliktet. Shkambi gjithashtu tha se është në konflikt me vëllezërit e tij dhe për këtë arsye i çuan Elvisin në gjykatë.
“I shpreh ngushëllime familjes së gjyqtarit Kalaja dhe kolegëve të tij. Nuk kam pasur dijeni që nipi im të ketë pasur armë; ta dija, do ta kisha parandaluar. Kam konflikte me vëllezërit e mi, ndaj dyshuan dhe ma vunë në përgjegjësi nipin tim Elvis. Nuk kam pasur ndërmend të përdor dhunë, sepse prej 30 vitesh zgjedh rrugën gjyqësore. Nëse do të kisha zgjedhur dhunën, do ta kisha bërë më përpara”, tha Shkambi.
Vendimi i Apelit mban në fuqi paraburgimin ndërsa hetimet për ngjarjen dhe rolin e të implikuarve vazhdojnë. Gjykata nuk pranoi kërkesën për lirimin, duke u bazuar në arsyet e paraqitura nga organet hetuese dhe provat në dosje.
