Një zjarr masiv ka përfshirë një sipërfaqe pyjore pranë Kombinatit Mekanik në Poliçan, duke shkaktuar alarm tek banorët dhe vështirësi në ndërhyrje për forcat zjarrfikëse. Zjarri, i cili vijon të jetë aktiv edhe këtë të enjte, ka nisur që prej mëngjesit dhe po shtrihet në një zonë të mbuluar me shkurre, në një terren të vështirë.
Sipas Policisë së Beratit, Specialistët e Seksionit për Hetimin e Krimeve në Stacionin e Policisë Poliçan kanë referuar materialet në Prokurori, ku ka nisur procedimi në gjendje të lirë për shtetasin M. S., 63 vjeç, banues në Poliçan dhe me probleme të shëndetit mendor. Ai dyshohet se ka ndezur zjarr në territorin e Kombinatit Mekanik, që më pas është përhapur në pyll.
“Është katastrofë, një gabim i rëndë për të ardhmen e fëmijëve tanë,” – u shpreh një banor i zonës, i shqetësuar për pasojat që mund të sjellë zjarri në mjedis dhe shëndetin publik.
Ndërhyrja e shpejtë është penguar nga terreni i thyer dhe mungesa e mjeteve të duhura. Hidrantët e uzinës nuk funksiononin, gjë që ka detyruar mjetet zjarrfikëse të furnizohen me ujë nga qyteti. Pavarësisht përpjekjeve të forcave zjarrfikëse dhe ushtrisë, zjarri në pyllin me shkurre mbetet ende aktiv, ndërsa zona pranë uzinës është vënë nën kontroll.
