Punonjësit e minierës së bakrit në Spaç kanë përshkallëzuar protestën këtë të enjte, duke u grumbulluar përpara Kuvendit të Shqipërisë.
Minatorët kërkojnë njohjen zyrtare të sindikatës që kanë krijuar dhe nënshkrimin e një kontrate kolektive, e cila, sipas tyre, do të siguronte paga më të drejta dhe kushte të sigurta pune.
Me pankarta në duar dhe thirrje “Duam të drejtat tona”, protestuesit kërkuan kushte më të mira pune dhe pensione dinjitoze për kontributin e viteve të tyre në minierë.
Ata paralajmëruan se do të vijojnë protestat deri në momentin që kërkesat e tyre të shqyrtohen dhe të nisin negociatat zyrtare për kontratën kolektive.
Nga ana tjetër, kompania që administron minierën ka deklaruar se do të respektojë procedurat ligjore për njohjen e sindikatës, përpara se të nisë çdo proces negociimi.
