Një defekt teknik i papritur ka shkaktuar ndërprerjen e plotë të sistemit informatik të Agjencisë Shtetërore të Kadastrës në të gjithë vendin. Si pasojë, qytetarët dhe institucionet publike e private nuk po mund të përfitojnë asnjë shërbim të lidhur me regjistrimin apo verifikimin e pronave.
Burime nga brenda institucionit bëjnë me dije se problemi është teknik dhe po punohet për rikthimin e funksionit të sistemit sa më parë. Deri në këtë moment nuk ka një afat zyrtar se kur do të rikthehen shërbimet online dhe ato në sportele.
Ndërkohë, shumë qytetarë që kishin prenotuar takime pranë zyrave të kadastrës janë kthyer mbrapsht, ndërsa procedurat ligjore dhe administrative që varen nga dokumentet kadastrale janë pezulluar përkohësisht.
Ky incident ka ngjallur shqetësim edhe në radhët e noterëve, bankave dhe institucioneve të tjera që varen nga të dhënat e kadastrës për proceset e tyre të përditshme.
Agjencia nuk ka dhënë ende një njoftim zyrtar për shkakun e defektit apo për kohën e pritshme të rikthimit në funksion të sistemit.
