Kryeministri Edi Rama ka reaguar pas publikimit të raportit të progresit të Komisionit Europian për Shqipërinë. Përmes një postimi në rrjetin social X, Rama ka shpërndarë deklaratën e komisioneres për Zhvillim, Marta Kos, e cila nuk i kursen asnjëherë lavdet ndaj qeverisë drejtë këtij procesi.
“Shqipëria ka shënuar përparim të paprecedentë. Ky rezultat i jashtëzakonshëm është një dëshmi e qartë e angazhimit të fortë politik të Shqipërisë dhe të aspiratave të qarta europiane të shoqërisë shqiptare”, shkruan Kos.
Rama i përgjigjet duke theksuar angazhimin e tij për të forcuar rolin e Shqipërisë në procesin e integrimit:
“Po, e bëmë dhe do të bëjmë gjithçka që duhet për t’u ulur më në fund si të barabartë rreth tryezës së BE-së. Le të vazhdojmë, të ecim përpara, së bashku“, shprehet kryeministri.
Megjithatë, ai nuk ka dhënë ende një arsyetim për vendimin e tij për të anuluar pjesëmarrjen në Samitin për Zgjerimin e Bashkimit Evropian, që zhvillohet sot në Bruksel dhe ku marrin pjesë udhëheqësit e vendeve kandidate për anëtarësim në Union.
Ky vendim ngre pikëpyetje, duke pasur parasysh angazhimin dhe premtimet e bujshme të kryeministrit dhe qeverisë së tij se integrimi në Bashkimin Evropian do të përmbylljet brenda vitit 2030.
Samiti i Zgjerimit të BE-së, që pritet të zhvillohet nga ora 14:00 deri në 17:00, ka në fokus diskutimet për forcimin e zërit të vendeve kandidate. Ndërkohë, presidentja e Komisionit Evropian, Ursula von der Leyen, e ka cilësuar këtë fazë të re si një proces të “ribashkimit të Evropës”.
