Partia Socialiste dhe Partia Demokratike duket se po gjejnë sërish gjuhën e përbashkët, këtë herë në Këshillin Bashkiak të Tiranës. Një ditë pasi VNA raportoi dhe publikoi kërkesën e këshilltarëve socialist për SPAK, që t’i jepte leje Erion Veliajt të merrte pjesë në mbledhjet e Këshillit Bashkiak, edhe këshilltarët e PD janë në të njëjtin mendim.
Këshilltari i PD, Dorian Teliti, tha për Top Channel se opozita dëshiron të ketë Veliajn në sallë për t’ia thënë në sy çdo akuzë.
“Të majtët vetë e larguan dhe vetë po e sjellin për disa orë liri. Opozita nuk është kundër, përkundrazi, e duam në sallë t’ia themi në sy. Ata e nxorën nga dera, ndërsa po e fusin nga dritarja.”
Megjithatë, ndryshe nga deklaratat e Telitit, “turpin me bukë” po e ndajnë të dyja palët në Këshillin Bashkiak. Ashtu siç votuan më parë për largimin e tij nga drejtimi i bashkisë, këshilltarët socialistë dhe ata demokratë janë sërish të njëjtën linjë për rikthimin e Veliajt.
Tashmë, vendimi i fundit i takon SPAK dhe Drejtorisë së Burgjeve, që do të vendosin nëse Veliaj do të lejohet të marrë pjesë fizikisht në mbledhjen e Këshillit Bashkiak të Tiranës.
