Deputeti i Partisë Demokratike, Gazment Bardhi, njëherësh drejtues politik i qarkut të Fierit, ka publikuar sot në rrjetet sociale një denoncim në lidhje me zgjedhjet e 11 majit, të cilat ai i cilëson si një “farsë elektorale” të organizuar nga Partia Socialiste në qarkun e Fierit.
Sipas Bardhit, në Njësinë Administrative Dushk, Bashkia Lushnje (QV 2817), është aplikuar një mekanizëm kriminal i kontrollit të votës nga komisionerë dhe vëzhgues të PS-së, me qëllim ushtrimin e presionit mbi votuesit. Ai thekson se çdo qytetar që tentonte të votonte i vetëm, i pa shoqëruar, bëhej objekt manipulimi: votat nxirreshin nga kutia për të verifikuar në mënyrë të paligjshme preferencën e tyre. Denoncimi është i shoqëruar me pamje filmike të kamerave të vendvotimit, të cilat, sipas Bardhit, dokumentojnë shkeljet flagrante të ligjit zgjedhor.
“Ky është një krim elektoral i rëndë, i cili ka mbetur i pandëshkuar për shkak të mosveprimit të institucioneve përgjegjëse si KQZ, Prokuroria e Përgjithshme dhe SPAK. Task-Forca e ngritur për mbrojtjen e zgjedhjeve ka rezultuar një spektakël pa efekt real,” deklaron Bardhi në reagimin e tij.
Ai thotë se Shqipëria nuk mund të ecë përpara në rrugën drejt integrimit europian pa garantuar zgjedhje të lira, të ndershme dhe të barabarta, duke shtuar se procesi i 11 Majit nuk ka përmbushur asnjë nga këto standarde.
