Në nderim të ish-kryeministrit të Shqipërisë, Fatos Nano, sot do të zhvillohet ceremonia funebre shtetërore në Pallatin e Kongreseve. Një prej figurave më të rëndësishme të tranzicionit politik shqiptar, Nano do të përcillet me nderimet më të larta të shtetit.
Qeveria ka shpallur 2 nëntorin ditë zie kombëtare, ndërsa flamujt në të gjitha institucionet publike janë ulur në gjysmë shtize. Miq, bashkëpunëtorë dhe qytetarë do të kenë mundësinë të nderojnë ish-liderin e Partisë Socialiste duke vendosur kurora me lule pranë arkivolit të tij.
Sipas axhendës zyrtare, homazhet publike do të zhvillohen nga ora 08:30 deri në 11:00, ndërsa në orën 11:15 do të mbërrijnë personalitetet shtetërore dhe Trupi Diplomatik. Ceremonia e lamtumirës do të nisë në orën 12:00, në prani të përfaqësuesve të lartë të shtetit dhe të vendeve mike. Pas përfundimit, kortezhi funebër do të përcjellë Fatos Nanon drejt banesës së fundit, në një ceremoni private familjare.
