Kreu i PD-së, Sali Berisha, reagoi ndaj lajmeve se ai do të ulet në një tryezë me kryeministrin Edi Rama për të diskutuar ngritjen e një Senati. Duke e përgënjeshtruar këtë, Berisha tha se diskutimet do t’i zhvillojnë përfaqësuesit e partive në komision, jo ai vetë, sikur vendimmarrja e tyre të ishte e pavarur nga drejtuesit politikë.
“Ka një komision parlamentar, dhe ai ligj nuk parashikon uljen time me Edi Ramën. Parashikon që përfaqësuesit e dy partive në komisionin elektoral të Parlamentit të diskutojnë edhe çështjet e Senatit. Po u ranë dakord, numri i deputetëve do të reduktohet. Dhe unë jam për këtë”, deklaroi Berisha.
Sipas tij, negociatat për ndryshimet e mundshme do të vijojnë në nivel teknik mes PS-së dhe PD-së, ndërsa ai mbetet pro uljes së numrit të deputetëve në Kuvend.
