Banorët e fshatit Gjorm të Vlorës janë tronditur nga një ngjarje e rëndë që ndodhi mbrëmjen e djeshme. Ata tregojnë se kanë mësuar për ngjarjen nga televizori dhe se nuk kanë dëgjuar të shtëna.
“E morëm vesh nga televizori. Ka pasur kohë që nuk dukej në fshat. Ka qenë i larguar, punët e tij, hallet e tij. Nuk dihet arsyeja”, tha njëri nga banorët.
Ngjarja ka ndodhur rreth orës 20:00 në rrugën përballë shtëpisë së autorit, ku 36-vjeçari Dallan Aliaj mbeti i vrarë nga kushëriri i tij, 32-vjeçari Bertil Alliaj. Banorët shtojnë se nuk dihet arsyeja e konfliktit, ndërsa autori ishte larguar nga fshati që prej vitit 2015 dhe nuk ishte parë më që atëherë.
“Ky që humbi jetën është kushëriri im. Viktima rrinte në Levan. Autori ka pasur probleme me shtetin. U habitëm si kishte mundësi që kishte ardhur. Ndoshta ka ardhur sepse ishte i ati sëmurë” tregojnë ata.
Policia ka nisur hetimet për zbardhjen e plotë të ngjarjes dhe për kapjen e autorit, ndërkohë që familjarët dhe fshatarët mbeten të tronditur nga rasti tragjik.
