Një diamant rozë prej 25 milionë dollarësh që u vodh në një grabitje të sofistikuar në Dubai është rikuperuar nga policia vetëm disa orë më vonë.
Diamanti “jashtëzakonisht” i rrallë u vodh nga një argjendari nga hajdutë që u shtirën si ndërmjetës për një blerës të mundshëm, tha Policia e Dubait në një deklaratë të hënën.
Me vlerë 21.25 karatë, diamanti i madh “krenohet me pastërti, simetri dhe lustrim të jashtëzakonshëm”, dhe ka një vlerësim unik pastërtie, sipas policisë.
Duke qenë kaq i rrallë ai u bë një objektiv tërheqës për bandën, e cila, sipas policisë, kishte punuar për më shumë se një vit për ta marrë gurin. Pasi ndoqën mbërritjen e diamantit në Dubai nga Evropa, banda hartoi një “plan të sofistikuar” për ta vjedhur atë. Hajdutët u shtirën si tregtarë të pasur duke marrë me qira makina luksoze dhe duke zhvilluar takime në hotele luksoze. Ata shkuan deri aty sa punësuan një ekspert diamantesh për të vërtetuar gurin, tha policia.
“Më në fund, banda e joshën tregtarin në një vilë nën pretekstin e prezantimit me ‘blerësin’,” thuhet në deklaratën e policisë. “Sapo diamanti u nxor, ata e rrëmbyen dhe u larguan.”
Megjithatë, policia identifikoi shpejt tre të dyshuar, i ndoqi dhe i arrestoi, duke rikuperuar diamantin përpara se të kontrabandohej jashtë Dubait.
Argjendari tha se shpejtësia e reagimit të autoriteteve ishte “mahnitëse”.
“Për habinë time, të nesërmen në mëngjes më telefonuan për të thënë se të dyshuarit ishin arrestuar dhe diamanti ishte rikuperuar,” tha ai në deklaratën e policisë, përpara se t’u bënte thirrje të tjerëve në tregtinë e diamanteve të ndjekin udhëzimet zyrtare të sigurisë të përcaktuara nga autoritetet e Dubait.
Dubai është bërë një qendër globale për tregtinë e diamanteve vitet e fundit, pjesërisht falë kërkesave minimale të taksave dhe vendndodhjes së përshtatshme mes vendeve prodhuese në Afrikë dhe tregjeve kryesore të shitjes si India.
