Presidenti i Venezuelës, Nicolás Maduro, ka vendosur 4.5 milionë anëtarë të Gardës Kombëtare në të gjithë territorin e vendit, si masë kundër një kërcënimi të ri nga Shtetet e Bashkuara të Amerikës. Lëvizja vjen pak ditë pasi Uashingtoni dyfishoi shpërblimin për kapjen e tij në 50 milionë dollarë, duke e akuzuar Maduron si drejtues të një karteli të drogës me bazë në Karakas.
Maduro deklaroi se forcat janë “të përgatitura, aktive dhe të armatosura”, dhe se ky plan i posaçëm synon të mbulojë çdo cep të vendit për të garantuar “sigurinë kombëtare”. Garda Kombëtare e Venezuelës, e themeluar nga ish-presidenti Hugo Chavez, numëron rreth 5 milionë anëtarë – përfshirë civilë dhe rezervistë – dhe i raporton drejtpërdrejt shtabit të përgjithshëm.
Në të njëjtën kohë, Sekretari Amerikan i Shtetit, Marco Rubio, bëri të ditur se SHBA ka vendosur forca detare dhe ajrore në rajonin e Karaibeve, si pjesë e një operacioni të gjerë kundër trafikut të drogës, i cili duket se synon indirekt edhe presionin ndaj regjimit të Maduros.
