Ernest Muçi nuk do të jetë më pjesë e Beshiktash, pasi Trabzonspor ka vendosur të aktivizojë opsionin e blerjes që ishte përfshirë në marrëveshjen e huazimit.
Lajmi është bërë zyrtar nga Beshiktash përmes një njoftimi në rrjetet sociale, ku konfirmohet transferimi përfundimtar i sulmuesit shqiptar drejt klubit nga Trabzoni.
“Sa i përket transferimit përfundimtar të futbollistit profesionist Ernest Muçi, e drejta e opsionit të blerjes e paraparë në kontratën e huazimit është përdorur nga Trabzonspor”, thuhet në deklaratën e klubit turk.
Sipas marrëveshjes mes dy klubeve, Trabzonspori do t’i paguajë Beshiktashit 8.5 milionë euro për kartonin e lojtarit, duke e bërë Muçin zyrtarisht pjesë të skuadrës në mënyrë të përhershme.
Drejtuesit e Beshiktash kanë falënderuar futbollistin shqiptar për kontributin e dhënë gjatë periudhës së tij te klubi bardhezi, ndërsa i kanë uruar sukses në vazhdim të karrierës.
“E falënderojmë Ernest Muçin për kontributin e dhënë për klubin tonë dhe i urojmë suksese në vazhdim të karrierës”, thuhet në reagimin zyrtar.
Edhe Trabzonspor ka konfirmuar zyrtarizimin e transferimit përmes kanaleve të veta në rrjetet sociale.
