Nga të qenit tepër të sjellshëm deri te shtirja sikur jeni në “Star Trek”, këshillat për të folur me chatbot-ët shpesh duken të çuditshme – dhe jo gjithmonë funksionojnë. Një grup studiuesish testuan nëse “mendimi pozitiv” e bën inteligjencën artificiale më të saktë. Ata e lavdëruan AI-në si “të zgjuar”, e nxitën të mendonte me kujdes dhe madje e mbyllën pyetjen me “Kjo do të jetë argëtuese!”. Asgjë nuk dha rezultat të qëndrueshëm. Por një teknikë spikati: kur i kërkuan AI-së të pretendonte se ishte në “Star Trek”, ajo u përmirësua në matematikë bazë.
Njerëzit përdorin strategji nga më të çuditshmet për të marrë përgjigje më të mira nga modelet e mëdha gjuhësore (LLM), teknologjia pas mjeteve si ChatGPT. Disa mendojnë se duhet t’i kërcënosh, të tjerë se duhet të jesh tepër i sjellshëm, ndërsa disa i kërkojnë AI-së të luajë rolin e një eksperti. Këto praktika njihen si “prompt engineering”. Por ekspertët thonë se shumë nga “rregullat” e përhapura nuk funksionojnë – madje ndonjëherë mund të jenë edhe të rrezikshme.
“Njerëzit mendojnë se ekziston një formulë magjike fjalësh,” thotë Jules White, profesor i shkencave kompjuterike në Universitetin Vanderbilt. “Por nuk ka të bëjë me zgjedhjen e fjalëve, por me mënyrën si e shpreh atë që kërkon.”
A duhet të jemi të sjellshëm?
Çdo fjalë që shkruani ndahet në “tokenë” dhe analizohet statistikisht nga modeli. Edhe një presje shtesë mund të ndikojë në përgjigje – por është shumë e vështirë të parashikohet si. Një studim në vitin 2024 sugjeroi se chatbot-ët japin përgjigje më të sakta kur u drejtohesh me mirësjellje. Një test tjetër tregoi se një version i mëparshëm i ChatGPT ishte më i saktë kur e fyenin. Rezultatet janë të paqëndrueshme dhe modelet përditësohen vazhdimisht, duke e bërë çdo përfundim të përkohshëm.
Ekspertët bien dakord se sot teknikat si lajkatimi, kërcënimi apo fyerja janë humbje kohe nëse synoni saktësi. Modelet e reja janë shumë më të afta të kuptojnë thelbin e kërkesës.
Si të merrni përgjigje më të mira
– Kërkoni disa opsione. Mos kërkoni një përgjigje, por tre apo pesë variante.
– Jepni shembuj. Nëse doni një email me stilin tuaj, dërgoni disa shembuj të mëparshëm.
– Lejoni AI-në t’ju intervistojë. Kërkojini të bëjë pyetje derisa të ketë informacion të mjaftueshëm.
– Kujdes me rolin e ekspertit. Për detyra kreative funksionon, por për pyetje me një përgjigje të saktë mund të rrisë rrezikun e gabimeve.
– Qëndroni neutral. Mos e drejtoni përgjigjen me preferencat tuaja.
A ka vlerë mirësjellja?
Mirësjellja nuk e bën modelin më të saktë, por mund t’ju bëjë ju më komod në përdorim. Sipas disa sondazheve, shumica e përdoruesve thonë “ju lutem” dhe “faleminderit” kur flasin me AI. Jo për shkak të frikës nga një rebelim robotësh, por sepse është zakon njerëzor.
Përfundimi? Inteligjenca artificiale nuk ka ndjenja – është një mjet që imiton sjelljen njerëzore. Nëse doni rezultate më të mira, trajtojeni si mjet, jo si person.
