Kompania mëmë e Google, Alphabet Inc., ka njoftuar një investim gjigant prej 15 miliardë dollarësh për ndërtimin e një qendre të dhënash të inteligjencës artificiale (AI) në shtetin jugor indian të Andhra Pradesh. Projekti do të vendoset në qytetin bregdetar të Visakhapatnam, duke u bërë pjesë e rrjetit global të qendrave të inteligjencës artificiale të Google në 12 vende të botës. Sipas njoftimit zyrtar, ky është investimi më i madh i Google në një qendër të inteligjencës artificiale jashtë Shteteve të Bashkuara, dhe pritet të përfundojë në disa faza gjatë pesë viteve të ardhshme.
Në një aktivitet të mbajtur në New Delhi të martën, Drejtori Ekzekutiv i Google Cloud, Thomas Kurien, deklaroi se projekti përfaqëson një hap strategjik për kompaninë në zgjerimin e infrastrukturës globale të inteligjencës artificiale. “Ky është një investim që do të forcojë përkushtimin tonë ndaj tregut indian dhe do të ndihmojë në rritjen e aksesit ndaj teknologjive të avancuara për bizneset dhe përdoruesit,” tha Kurien.
Njoftimi i Alphabet vjen në një moment kur Presidenti i Shteteve të Bashkuara, Donald Trump, u ka bërë thirrje kompanive amerikane që të fokusohen më shumë te investimet vendase. Megjithatë, India është shfaqur si një qendër në rritje për zhvillimin e infrastrukturës së të dhënave dhe të inteligjencës artificiale, për shkak të kostove të ulëta, përdorimit masiv të internetit, dhe një tregu digjital që po zgjerohet me ritme të shpejta.
Drejtori Ekzekutiv i Alphabet, Sundar Pichai, theksoi se objekti i ri në Visakhapatnam “do t’u sjellë teknologjitë më të avancuara të Google bizneseve dhe përdoruesve në Indi, duke përshpejtuar inovacionin në fushën e inteligjencës artificiale dhe duke nxitur rritjen ekonomike në të gjithë vendin.”
Nga ana tjetër, Qeveria e Andhra Pradesh ka njoftuar se marrëveshja zyrtare për finalizimin e projektit do të nënshkruhet brenda ditës. Ministrja e Teknologjisë së Shtetit, Nara Lokesh, e cilësoi këtë zhvillim si “një hap gjigant drejt së ardhmes dixhitale, inovacionit dhe rritjes së njohjes ndërkombëtare të Andhra Pradesh.”
Sipas BBC-së, projekti do të kombinojë teknologjinë e avancuar të inteligjencës artificiale dhe shërbimet cloud me burime energjie të rinovueshme dhe një rrjet të gjerë fibrash optike. Gjithashtu, iniciativa është pjesë e strategjisë afatgjatë të qeverisë lokale për të zhvilluar deri në 6 gigavat kapacitet energjie për qendrat e të dhënave deri në vitin 2029, sipas raportimeve të Bloomberg News.
Qendrat e të dhënave (data centers) janë objekte fizike që strehojnë pajisje kompjuterike dhe rrjetëzimi, duke shërbyer për mbledhjen, përpunimin, ruajtjen dhe shpërndarjen e të dhënave. Këto struktura përfshijnë servera, sisteme ruajtjeje, pajisje rrjeti si routerë dhe firewall-e, si dhe sistemet e nevojshme të energjisë elektrike dhe ftohjes për të garantuar funksionimin e pandërprerë.
Në kuadër të këtij projekti, qeveria e Andhra Pradesh po ofron tokë dhe energji elektrike të subvencionuar për të tërhequr investitorë ndërkombëtarë dhe për të konsoliduar pozitën e shtetit si një qendër teknologjike rajonale.
Ky investim i Alphabet pritet të ketë ndikim të madh në ekonominë indiane, duke krijuar mijëra vende pune, duke rritur kapacitetet teknologjike të vendit dhe duke e pozicionuar Indinë si një nga nyjet kryesore të zhvillimit të inteligjencës artificiale në botë.
