Një celular i harruar në xhep dhe kardinalë pa orë me alarm. Këto janë disa nga prapaskenat e Konklavës së fundit në Vatikan, që zgjodhi Papa Leone XIV, sipas një libri të ri investigativ nga gazetarët Elisabetta Piqué dhe Gerald O’Connell.
Libri, me titull “The Election of Pope Leo XIV: The Last Surprise of Pope Francis”, zbulon se vonesa e tymit të zi në mbrëmjen e 7 majit nuk u shkaktua vetëm nga predikimi i gjatë para votimit, por edhe nga një incident teknologjik: një kardinal i moshuar kishte harruar një telefon celular në xhep, gjë rreptësisht e ndaluar në Kapelën Sistine. Sinjali u kap nga siguria dhe pajisja u dorëzua menjëherë, në një skenë që autorët e përshkruajnë si “të paimagjinueshme, edhe për një film”.
133 kardinalët zgjedhës hynë në Konklavë në orën 16:30, ndërsa “extra omnes” u shpall rreth orës 17:45. Tym i zi pritej rreth orës 19:30, por doli vetëm pas orës 21:00, duke ngritur pikëpyetje mes besimtarëve në Sheshin e Shën Pjetrit. Për shkak të sekretit të rreptë, askush nuk dinte arsyen e vonesës.
Një tjetër detaj interesant lidhet me mungesën e telefonave, që zakonisht përdoren si alarm. Disa kardinalë, të strehuar në Casa Santa Marta, rrezikuan të flinin më shumë se duhet. Vatikani u shpërndau atyre orë me alarm, por jo të gjithë arritën t’i rregullonin siç duhet. Madje, disa u ankuan edhe për mungesën e një tualeti brenda Kapelës Sistine, duke u shoqëruar jashtë nga një kardinal diakon. “Është si të kthehesh në kopësht”, citohet të ketë thënë një prej tyre.
Sa i përket votimit, autorët shkruajnë se favoritët fillestarë ishin kardinali hungarez Peter Erdő, italiani Pietro Parolin dhe amerikani Robert Francis Prevost. Brenda katër raundeve, mbështetja u konsolidua rreth Prevostit, i cili u zgjodh Papa Leone XIV me 108 vota.
Libri zbulon gjithashtu se raundi i katërt i votimit u përsërit, pasi një kardinal hodhi gabimisht dy fletë votimi në urnë – një incident i ngjashëm me atë të Konklavës së vitit 2013.
