Qyeti i Nicës në Francë u përfshi nga tensione të forta përpara ndeshjes së Europa League midis skuadrës vendase dhe ekipit italian të Romës. Incidentet shpërthyen në Place Masséna, një nga sheshet kryesore të qytetit, ku tifozë italianë nisën të përplaseshin me policinë franceze. Sipas raportimeve të gazetës L’Equipe, autoritetet franceze konfirmuan se 102 persona u arrestuan dhe u dërguan në paraburgim, pasi u gjetën “në posedim të armëve”. Policia e departamentit Alpes-Maritimes njoftoi se incidentet nisën kur disa tifozë, të ulur në një tarracë restoranti, filluan të hidhnin gota drejt efektivëve, duke detyruar ndërhyrjen e forcave të rendit dhe një ndjekje në rrugicat e Nisë së Vjetër. Disa prej të arrestuarve mbanin balaklava për të shmangur identifikimin, ndërsa gjatë kontrolleve u sekuestruan një sërë objektesh të rrezikshme, përfshirë shufra hekuri, tuba plastike, doreza fshesash, lopata, thika dhe çekiçë. Për të frenuar trazirat, mbi 200 oficerë policie dhe xhandarë, përfshirë dy njësi të lëvizshme, u vendosën në zonat kryesore të qytetit. Të ndaluarit u transferuan në stacionet policore dhe më pas iu dërguan gjykatave sipas urdhrit të prokurorit të Nisë.
Prefektura e Alpes-Maritimes ka paralajmëruar se për mbrëmjen në vijim do të angazhohen më shumë se 400 forca sigurie, të uniformuara dhe civile, me qëllim parandalimin e përshkallëzimit të dhunës dhe garantimin e rendit publik.
Avokati Lorenzo Contucci, përfaqësues i disa tifozëve italianë, theksoi se këto janë masa ndalimi 24-orëshe dhe jo arrestime përfundimtare:
“Nëse nuk gjenden prova, ata duhet të lirohen; vetëm ata kundër të cilëve ka prova konkrete mund të mbeten të arrestuar.”
Sipas tij, në raste të ngjashme, autoritetet franceze shpesh ndërhyjnë me masa të gjera ndaj turmave pa dallim të qartë individual.
Ky episod sjell në kujtesë ngjarjet e vitit 2013 në Varshavë, kur dhjetëra tifozë të Lazios u ndaluan para ndeshjes së Europa League kundër Legia Varshavës. Edhe pse numri i arrestimeve në atë kohë ishte më i ulët, përplasjet e dhunshme dhe sulmet ndaj policisë kishin ngritur shqetësime të ngjashme mbi sigurinë dhe masat e nevojshme për të parandaluar skena të tilla në të ardhmen.
