Kombëtarja Shpresa e Shqipërisë U-21 zhvilloi sot një miqësore luksi në “Elbasan Arena” përballë Gjermanisë U-21, e cila përfundoi me fitoren e miqve 0-2.
Ndeshja u karakterizua nga një lojë e luftuar dhe me intensitet të lartë, ku kuqezinjtë e Alban Bushit tentuan disa herë të surprizonin finalistët e fundit të Europianit U-21. Në radhët e miqve, gjatë pjesës së parë u aktivizuan edhe dy futbollistë me origjinë shqiptare, Brajan Gruda dhe Nelson Weiper.
Pjesa e parë u mbyll pa gola, por në fillim të fraksionit të dytë gjermanët treguan efikasitet. Në minutën e 48-të, sulmuesi i sapofutur Ansah kaloi “Panzerat” në avantazh, ndërsa vetëm katër minuta më vonë, në të 52’, Pejcinovic dyfishoi shifrat, duke vulosur rezultatin final 0-2.
Pavarësisht humbjes, Shqipëria U-21 tregoi përkushtim dhe karakter në fushë, duke lënë përshtypje pozitive përballë një prej ekipeve më të forta të moshave në Europë.
Ndërkohë, Kombëtarja Shpresa nuk do të ketë ndeshje zyrtare deri në verën e vitit 2027, kur do të marrë pjesë si bashkë-organizatore me Serbinë në Kampionatin Europian U-21.
Rezultati përfundimtar:
???????? Shqipëri U-21 0–2 Gjermani U-21 ????????
⚽ Ansah 48’, Pejcinovic 52’
