Shqipëria U-19 barazoi 1-1 ndaj Italisë në ndeshjen e dytë miqësore, e zhvilluar sot në “Novarello Sporting Center”. Të besuarit e trajnerit Julian Ahmataj treguan karakter, duke reaguar në pjesën e dytë pas disavantazhit fillestar.
Formacioni titullar i Shqipërisë përbëhej nga: Culi (GK), Avdullari, Gecaj, Sylejmani, Sina, Huqi, Shpuza, B. Krasniqi, Arifi (C), Malaj dhe L. Krasniqi.
Italia kaloi në epërsi në minutën e 28-të me golin e Andrea Orlanit. Gjatë pjesës së parë, kuqezinjtë humbën dy titullarë për shkak dëmtimi – kapitenin Arifi dhe mbrojtësin Gecaj – të cilët u zëvendësuan përkatësisht nga El Malem dhe Mateo Dashi. Në lojë u aktivizua gjithashtu edhe Krasniqi.
Shqipëria gjeti barazimin në minutën e 60-të, me një gol të bukur të shënuar nga Mateo Dashi. Në vazhdim, trajneri Ahmataj bëri edhe dy zëvendësime të tjera, duke futur në fushë Latajn dhe Gashin.
Takimi u mbyll me rezultatin 1-1, duke përfaqësuar një përmirësim të dukshëm krahasuar me miqësoren e parë, të cilën Shqipëria e kishte humbur 4-1. Këto sfida shërbejnë si përgatitje për kualifikueset e ardhshme të Kampionatit Europian U-19, ndërsa stafi teknik pati mundësi të testojë shumicën e lojtarëve në dispozicion.
