Kombëtarja shqiptare do të zhvillojë një ndeshje miqësore në muajin tetor kundër përfaqësueses së Jordanisë. Kjo përballje të zhvillohet më 14 tetor, në stadiumin “Air Albania” në Tiranë, me fillim nga ora 19:00.
Kjo do të jetë ndeshja e dytë në histori mes dy skuadrave. Takimi i parë është luajtur më 10 tetor 2018 në “Elbasan Arena” dhe është mbyllur me rezultatin 0-0.
Data 14 tetor është e lirë sipas kalendarit zyrtar të FIFA-s, pasi Shqipëria ndodhet në një grup me pesë ekipe në kualifikueset për Kupën e Botës 2026 dhe këtë ditë nuk zhvillon ndeshje zyrtare.
Para kësaj miqësoreje, kuqezinjtë do të luajnë më 11 tetor një ndeshje tejet të rëndësishme për kualifikueset e Botërorit, ndaj Serbisë në Beograd. Kjo sfidë pritet të jetë vendimtare për ecurinë e Shqipërisë në rrugëtimin e saj drejt “Botërorit 2026”.
