Federata e Futbollit e Serbisë ka nisur lëvizjet për të ndryshuar vendin e zhvillimit të ndeshjes së ardhshme kundër Shqipërisë, e vlefshme për kualifikueset e Kupës së Botës 2026, duke i kërkuar UEFA-s që takimi të mos zhvillohet në Beograd, por në një qytet tjetër, sa më larg kryeqytetit serb.
Pas humbjes së thellë 5:0 që Serbia pësoi në shtëpi kundër Anglisë, situata ka marrë përmasa të ndërlikuara, jo vetëm në aspektin sportiv, por edhe në atë të sigurisë. Ndeshja me Shqipërinë, e cila pritet të vendosë fatin e vendit të dytë në grup dhe rrjedhimisht kualifikimin për në playoff, ishte parashikuar fillimisht të zhvillohej në stadiumin “Rajko Mitić” (i njohur si Marakana) në Beograd, me kapacitet rreth 52 mijë vendesh.
Megjithatë, Federata Serbe e Futbollit po shqyrton seriozisht mundësinë që kjo ndeshje të zhvendoset në stadiumin e Leskovcit, “Doçica”, me një kapacitet shumë më të kufizuar prej vetëm 8 mijë vendesh. Vendimi vjen për shkak të shqetësimeve për sigurinë, duke qenë se autoritetet serbe e kanë të vështirë të kontrollojnë huliganët e tyre, ndërsa frika për përsëritjen e ngjarjeve të së shkuarës është e madhe.
Sekretari i përgjithshëm i Federatës së Futbollit të Serbisë, Branko Radujko, në një deklaratë për agjencinë Tanjug, theksoi rëndësinë e kësaj ndeshjeje:
“Tani tjetër është vetëm pas tre javësh, të paktën atëherë fillon grumbullimi për ndeshjen më të rëndësishme në kualifikuese, për ndeshjen me Shqipërinë, e cila do të vendosë drejtpërdrejt se kush do të shkojë në playoff për Kupën e Botës.“
Ai shtoi se dëshira e federatës është që dueli të luhet në Leskovc:
“Po punojmë intensivisht për të marrë miratimin për ndryshimin e vendndodhjes për atë ndeshje. Leskovci është një mjedis ku kombëtarja është përgatitur gjithmonë në qetësi, ku është pritur me mbështetje të pakursyer në një atmosferë jashtëzakonisht pozitive dhe ku ka regjistruar disa rezultate shumë të rëndësishme pozitive. Kam besim se do të luajmë atje, në Leskovc.“
Nga ana tjetër, pas ngjarjeve të fundit në ndeshjen ndaj Anglisë, priten edhe masa disiplinore nga UEFA, të cilat mund të përfshijnë zhvillimin e ndeshjes së radhës pa praninë e tifozëve, përveç një gjobe të majme financiare.
Kombinimi i rrezikut të përplasjeve të dhunshme, vështirësisë për të menaxhuar tifozët radikalë dhe dënimeve të mundshme nga UEFA duket se ka detyruar organizatorët serbë të kërkojnë një alternativë më të sigurt, duke e larguar ndeshjen sa më shumë nga qendra e tensioneve, Beogradi.
