Pas një sezoni historik dhe triumfit në Ligën e Kampionëve, Paris Saint-Germain ka bërë përzgjedhjen e 9 lojtarëve të saj që janë në listën e ngushtë prej 30 emrash për çmimin prestigjioz “Topi i Artë” për vitin 2025. Megjithatë, në dhomat e zhveshjes të skuadrës, atmosfera nuk është e qetë, pasi kanë nisur përplasjet dhe rivaliteti mes pretendenteve për çmimin më të lakmuar individual në futboll.
Fillimisht, mbështetja e grupit dukej e sigurtë për sulmuesin Ousmane Dembélé, i cili është një nga kandidatë kryesorë. Por situata ndryshoi ndjeshëm pas deklaratave të mbrojtësit Achraf Hakimi, i cili për Canal+ theksoi:
“Topi i Artë është një ëndërr që nuk e kisha imagjinuar kurrë. Kam shënuar në çerekfinale, gjysmëfinale dhe finale – diçka që Dembélé nuk e ka bërë – dhe për një mbrojtës kjo është shumë më e vështirë. Mendoj se e meritoj edhe më shumë se një sulmues.”
Sipas raportimeve të gazetës L’Equipe, zyra e shtypit të PSG-së u përpoq të censuronte komentet e Hakimit për të ruajtur harmoninë në skuadër, por mbrojtësi maroken refuzoi t’i tërhiqte fjalët.
Në mesin e 9 lojtarëve të PSG që janë në listën për “Topin e Artë” janë edhe portieri Gianluigi Donnarumma, i cili gjithashtu po kërkon të marrë pjesën e tij të vëmendjes. Ai ka publikuar në rrjetet sociale një mesazh që kujton se është i vetmi portier i nominuar për këtë çmim. Agjenti i tij, Vincenzo Raiola, ka deklaruar për “Gazzetta dello Sport”:
“Pa pritjet vendimtare të Gigios ndaj Liverpool, Aston Villa dhe Arsenal, PSG nuk do ta kishte fituar kurrë Ligën e Kampionëve.”
Në listën e lojtarëve të PSG-së që konkurojnë për Topin e Artë janë gjithashtu: Doué, Kvaratskhelia, Vitinha, Neves, Ruiz dhe Mendes.
Presidenti i klubit, Nasser Al-Khelaifi, kishte deklaruar më parë se do të ishte një problem i madh nëse Dembélé nuk do ta fitonte çmimin, por rivaliteti i brendshëm po rritet dhe po ndikon në atmosferën brenda skuadrës.
Kjo situatë tregon se pas triumfit në Ligën e Kampionëve, pretendentët për “Topin e Artë” në PSG janë shumë të fortë dhe gara për çmimin e madh është tashmë shumë e nxehtë edhe brenda vetë kampionëve francezë.
