Federata Serbe e Futbollit ka vendosur që ndeshja midis Serbisë dhe Shqipërisë, e cila ishte planifikuar të zhvillohej në Beograd, të zhvendoset në Leskovac. Kjo masë është pjesë e një pakete vendimesh drastike për të parandaluar huliganizmin dhe incidentet gjatë sfidës që do të luhet më 11 tetor.
Përveç zhvendosjes së ndeshjes, Federata Serbe në bashkëpunim me FIFA-n dhe Ministrinë e Brendshme të Serbisë ka vendosur që biletat për këtë ndeshje të mos jenë në shitje të lirë. Ato do të shpërndahen vetëm për persona të identifikuar dhe të verifikuar me dokumente, në mënyrë që të parandalohet hyrja e personave me qëllime problematike në stadium.
Kjo vendimmarrje vjen pas incidentit të ndodhur në ndeshjen e vitit 2014 në Beograd, e cila u ndërpre dhe solli pasoja serioze për ekipin kombëtar serb. Federata dhe institucionet ndërkombëtare po marrin masa strikte për të garantuar sigurinë dhe zhvillimin normal të ndeshjes këtë herë.
