Edhe pse dekada kanë kaluar nga rënia e diktaturës, fantazmat e ish-Sigurimit po tentojnë të rikthehen në jetën publike përmes titujve të nderit dhe emërtimit të rrugëve. Raporti i fundit i Autoritetit të Dosjeve ka ndezur alarmin, duke zbuluar se 15 persona me të kaluar bashkëpunëtorësh u përzgjodhën si kandidatë për t’u nderuar nga institucionet dhe bashkitë. 12 prej tyre, i përkasin procedurave verifikuese sipas objektit të kërkesave të bashkive si bashkëpunëtorë, ndihmës gjyqtar dhe një si dëshmitar, pra janë shtetas të propozuar për emërtim rrugësh, hapësirash apo dekorim dhe dhënie titulli nderi
Paradoksi thellohet kur bëhet fjalë për majat e politikës, ku verifikimi i pastërtisë së figurës duket se mbetet thjesht një çështje "dëshire" dhe jo detyrimi.
Nga raporti vjetor rezulton se nga 53 parti politike që garuan në parlamentaret e 2025, vetëm gjashtë kandidatë patën guximin të kërkonin vullnetarisht një certifikatë pastërtie, duke lënë pjesën tjetër të listave në hije.
Kjo neglizhencë e qëllimshme e partive politike për të bashkëpunuar me ligjin po krijon një terren ku e kaluara komuniste mund të maskohet lehtësisht me dekorata moderne. Tashmë topi mbetet në fushën e Kuvendit, ku ky raport pritet të përplasë deputetët në një diskutim të nxehtë mbi atë se kush meriton vërtet të nderohet në hapësirat tona publike.
