Kombëtarja shqiptare e futbollit do të zbresë sonte në fushën e stadiumit “Air Albania” përballë Letonisë, në një ndeshje vendimtare të vlefshme për kualifikueset e Kupës së Botës 2026. Për kuqezinjtë e drejtuar nga trajneri Silvinjo, kjo përballje është konsideruar si një “finale” e parakohshme, duke marrë parasysh situatën aktuale në grup.
Shqipëria ndodhet në një pozitë delikate dhe çdo rezultat tjetër përveç fitores do ta vendoste kombëtaren kuqezi pothuajse jashtë garës për një nga dy vendet e para që sigurojnë kualifikimin. Në rast të humbjes së pikëve, Shqipërisë do t’i duhej një mrekulli në ndeshjet e mbetura për të mbajtur gjallë shpresat.
Në këto rrethana, trajneri brazilian ka zgjedhur të hedhë në fushë një formacion të orientuar qartë drejt sulmit. Silvinjo ka vendosur të aktivizojë disa prej emrave më të rëndësishëm të skuadrës, duke përfshirë kapitenin Elseid Hysaj, sulmuesin Armando Broja si dhe Sokol Manajn, për të rritur fuqinë ofensive të ekipit.
Publikimi i formacioneve zyrtare ka treguar qartë idenë taktike të trajnerit: Shqipëria do të kërkojë me çdo kusht tre pikët përballë Letonisë, duke ushtruar presion konstant në portën kundërshtare.
Ndeshja pritet me interes të madh nga tifozët shqiptarë, të cilët shpresojnë se kombëtarja do të arrijë një fitore vendimtare që do të mbajë gjallë ëndrrën e pjesëmarrjes në Botërorin 2026.
Formacionet zyrtare:
