Pas një maratone prej gati 12 orësh, Këshilli Bashkiak i Milanos miratoi në orët e vona të natës vendimin historik për shitjen e stadiumit legjendar “San Siro” dy klubeve të qytetit, Interit dhe Milanit.
Oferta e përbashkët prej 197 milionë eurosh u aprovua me 24 vota pro dhe 20 kundër, ndërsa vendimi u bë i mundur falë daljes nga salla të këshilltarëve të Forza Italia, çka uli kuorumin e nevojshëm për miratim.
Stadiumi ikonë, i inauguruar rreth një shekull më parë, do të përdoret edhe për ceremoninë hapëse të Lojërave Olimpike Dimërore Milano-Cortina 2026. Pas këtij eventi, parashikohet prishja e tij për t’i lënë vendin një impianti të ri, modern dhe më funksional, i cili pritet të jetë gati për Euro 2032.
“Ky është vetëm fillimi i një faqeje të re për San Siron. Kemi hedhur bazat për transformimin e zonës dhe për të shmangur pasiguritë për të ardhmen e saj”, deklaroi zëvendës-kryetarja e Bashkisë, Anna Scavuzzo.
Tani sfida i kalon klubeve milaneze, të cilat duhet të ndërmarrin hapat konkretë për realizimin e projektit që pritet të ndryshojë përgjithmonë peizazhin e futbollit në Milano.
