Marash Kumbulla është zyrtarisht lojtari më i ri i RCD Mallorca-s. Qendërmbrojtësi shqiptar, i lindur më 2000, vjen në formë huazimi të thjeshtë nga AS Roma dhe do të jetë pjesë e klubit spanjoll deri në fund të sezonit.
Në fjalët e para si lojtar i Mallorcës, Kumbulla shprehu entuziazmin për këtë hap të ri në karrierën e tij:
“Jam shumë i lumtur që jam këtu. Kam folur me drejtorin Pablo Ortells dhe me trajnerin Jagoba Arrasate, dhe ata kanë shumë besim tek unë. Më kanë treguar shumë për projektin që ka Mallorca dhe, kur klubi më thirri, desha të vija sa më shpejt të ishte e mundur,” tha ai gjatë prezantimit zyrtar.
Ky është një rikthim në LaLiga për mbrojtësin shqiptar, i cili sezonin e kaluar luajti me RCD Espanyol, ku grumbulloi 36 paraqitje mes kampionatit dhe Kupës së Mbretit. Tashmë, në një sfidë të re me fanellën e Mallorcës, Kumbulla ka objektiva të qarta:
“Dua të luaj sa më shumë ndeshje të jetë e mundur dhe të ndihmoj skuadrën të arrijë maksimumin. Me trajnerin kemi folur për atë që ai kërkon, për klubin, tifozët dhe gjithçka që përfaqëson Mallorca. Më pëlqeu shumë.”
Te skuadra e re, Kumbulla do të gjejë edhe një fytyrë të njohur: sulmuesin kosovar Vedat Muriqi, me të cilin është njohur gjatë kohës së qëndrimit në Spanjë.
“Me Vedatin kemi folur kur e takova këtu, te Espanyol-i. Kam një marrëdhënie të mirë me të dhe dua ta shoh përsëri së shpejti,” zbuloi ai.
Në fund, mbrojtësi shqiptar pati edhe një mesazh për tifozët e skuadrës së re: “Faleminderit për mikpritjen. Do të jap gjithçka për këtë stemë dhe dua të luaj këtu, te Mallorca, së bashku me ju.”
Me këtë transferim, Marash Kumbulla bëhet lojtari i parë shqiptar që vesh fanellën e RCD Mallorca-s. Ai ka gjithashtu një karrierë të pasur në futbollin italian, me përvoja te Hellas Verona, Sassuolo dhe AS Roma.
Ndërkohë, me kombëtaren shqiptare, Kumbulla numëron 24 ndeshje zyrtare.
