Federata e Futbollit të Kosovës (FFK) i është drejtuar Federatës Evropiane të Futbollit (UEFA) me një notë zyrtare proteste, pasi Federata Spanjolle e Futbollit (RFEF) i është referuar Kosovës si “territori i Kosovës” në komunikimet e saj zyrtare përpara ndeshjes së sotme kualifikuese për Evropianin e ardhshëm U-21. Në një shkresë të adresuar presidentit të UEFA-s, Aleksander Ceferin, si dhe kreut të Federatës Spanjolle, Rafael Louzan, FFK-ja e cilësoi këtë veprim si të papranueshëm dhe në kundërshtim me parimet themelore të futbollit evropian.
“Një qasje e tillë e mohon sovranitetin e Kosovës, e cila është shtet i pavarur dhe e përfaqësuar nga Federata e Futbollit të Kosovës, anëtare e barabartë dhe e plotë e UEFA-s, ashtu siç është edhe vetë RFEF”, thuhet në letrën e dërguar nga presidenti i FFK-së, Agim Ademi.
FFK-ja theksoi se kjo nuk është hera e parë që ndeshet me një qasje të tillë nga Federata Spanjolle. “Ne e konsiderojmë këtë plotësisht të papranueshme. Kërkojmë nga UEFA një reagim të qartë dhe të menjëhershëm për këtë çështje, si dhe një korrigjim publik dhe pranim zyrtar nga Federata e Futbollit të Spanjës, duke e pranuar se veprimet e tyre ishin të papërshtatshme dhe në kundërshtim me parimet themelore të UEFA-s”, thuhet në shkresë.
FFK-ja shtoi më tej se shpreson të trajtohet gjithmonë si anëtare e barabartë e UEFA-s, jo vetëm nga institucioni evropian, por edhe nga të gjitha federatat kombëtare anëtare të tij.
Ndeshja mes Kosovës U-21 dhe Spanjës U-21 do të zhvillohet pasdite në stadiumin “Fadil Vokrri” në Prishtinë, në kuadër të Grupit A të kualifikimeve për Kampionatin Evropian të vitit 2027, i cili do të bashkorganizohet nga Shqipëria dhe Serbia. Përveç Kosovës dhe Spanjës, në këtë grup bëjnë pjesë edhe Finlanda, Rumania, Qipro dhe San Marino. Kosova e nisi fushatën kualifikuese më 5 shtator me një barazim kundër Rumanisë.
Kjo nuk është hera e parë që Kosova përballet me një mosnjohje të tillë nga Spanja. Edhe në vitin 2021, gjatë ndeshjeve kualifikuese për Kupën e Botës 2022, Federata Spanjolle, në komunikimet e saj për ndeshjen ndaj Kosovës, i ishte referuar shtetit të pavarur si “territori i Kosovës”.
