Një propozim i raportuar nga mediat ndërkombëtare ka hapur debat për një ndryshim të mundshëm rrënjësor në mënyrën e transmetimit të garave evropiane të futbollit, duke përfshirë Ligën e Kampionëve, Ligën e Evropës dhe Ligën e Konferencës.
Sipas raportimeve, presidenti i Real Madridit, Florentino Perez, ka propozuar që këto kompeticione të bëhen të aksesueshme falas për tifozët në mbarë botën, përmes një modeli të ri digjital të financuar nga reklamat.
Ideja vjen në një moment kur klubi madrilen po përgatitet për zgjedhje të parakohshme të drejtimit, të cilat mund të ndikojnë edhe në të ardhmen e projekteve të tij.
Sipas mediave spanjolle, plani parashikon krijimin e një platforme të re transmetimi falas, ndërsa në negociata përmendet edhe mundësia e një marrëveshjeje me UEFA-n për të rishikuar modelin aktual televiziv.
Megjithatë, disa burime të sektorit e kanë cilësuar këtë ide si të vështirë për t’u realizuar, duke e quajtur pjesërisht edhe si “premtim politik” në kuadër të zhvillimeve brenda klubit.
Ndërkohë, aktualisht transmetimi i kompeticioneve evropiane në disa tregje është i lidhur me platforma me pagesë, ndërsa në Mbretërinë e Bashkuar këtë vit finalet nuk do të jenë të aksesueshme falas si më parë, por vetëm për abonentët e platformave përkatëse.
Kontratat aktuale të të drejtave televizive pritet të ndryshojnë nga sezoni 2027-28, kur edhe disa platforma të reja do të marrin përsipër transmetimin e garave kryesore të UEFA-s.
