Pas transferimit te Burnley për 20 milion stërlina, Armando Broja rikthehet në krye të listës së futbollistëve më të shtrenjtë të Kombëtares së Shqipërisë. Sulmuesi kuqezi, i cili u bashkua me klubin anglez nga Chelsea, la pas në renditje Kristjan Asllanin dhe Ernest Muçin.
Kalimi te Burnley ka rritur ndjeshëm vlerën e Brojës në merkato, duke e bërë sërish lider mes kuqezinjve. Edhe pse vlerësimi i tij ka qenë më i lartë në të kaluarën, dy sezonet e fundit u ndikuan nga dëmtime të rënda, të cilat ulën kuotat e tij në tregun ndërkombëtar. Tashmë, në moshën 23-vjeçare, Broja kthehet si pika më e lartë referuese në aspektin financiar për Kombëtaren shqiptare.
Në vendin e dytë të këtij klasifikimi qëndron Kristjan Asllani. Mesfushori i Interit, që pritet të largohet nga zikaltërit gjatë merkatos, vlerësohet me 13 milion euro nga portali i specializuar “Transfermarkt”. Megjithatë, Interi synon të përfitojë jo më pak se 15 milion euro nga shitja e tij.
Podiumin e plotëson Ernest Muçi. Sulmuesi i Beshiktashit, i transferuar nga Legia e Varshavës për rreth 10 milion euro, ka ruajtur të njëjtën vlerë në treg edhe pas paraqitjeve të tij në kampionatin turk.
Pesëshja e parë e futbollistëve shqiptarë më të shtrenjtë plotësohet nga Mirlind Daku dhe Myrto Uzuni. Daku, që luan për Rubin Kazan, ka një vlerë prej 8 milion eurosh, ndërsa Uzuni, i cili vendosi të vazhdojë karrierën në MLS me skuadrën e Austin FC, vlerësohet 7.5 milion euro.
Në dhjetëshen e futbollistëve kuqezi me vlerën më të lartë në merkato renditen gjithashtu Marash Kumbulla, Anis Mehmeti, Berat Gjimshiti, Ardian Ismajli dhe Mario Mitaj.
Ky renditje tregon se futbollistët shqiptarë po ruajnë një prani të qëndrueshme në merkato ndërkombëtare, me disa prej tyre që pritet të bëjnë lëvizje të rëndësishme gjatë këtij sezoni, duke rritur më tej vlerat e tyre financiare dhe prestigjin e Kombëtares.
