Klubi anglez Aston Villa ka vendosur të mos lejojë asnjë tifoz të Maccabi Tel Aviv në stadiumin Villa Park gjatë ndeshjes së ardhshme të Ligës së Evropës, për shkak të shqetësimeve serioze për sigurinë. Vendimi u mor pas rekomandimeve të Grupit Këshillues për Sigurinë (SAG), që ka detyrë të lëshojë certifikatat e sigurisë për ndeshjet.
Sipas klubit, policia britanike paralajmëroi për rrezik të mundshëm protestash jashtë stadiumit, duke e bërë të pamundur garantimin e rendit publik gjatë takimit. Ky vendim vjen pas incidenteve të fundit në Oslo dhe Udine, ku protestues pro-palestinezë u përplasën me policinë gjatë ndeshjeve të kombëtares së Izraelit.
Nga ana e saj, UEFA theksoi se synon të krijojë kushte të sigurta për tifozët e të dy ekipeve, por la në dorë të autoriteve lokale britanike vendimin përfundimtar mbi masat e sigurisë.
Aston Villa aktualisht mban vendin e tretë në grupin e Ligës së Evropës, ndërsa Maccabi Tel Aviv renditet i tridhjeti pas dy ndeshjeve.
